中環出更（二）：楊華勇閃石iPhone套獨一無二

2010-03-11 15:00

跟蹤提及過的人和物:

上一則新聞: 中環出更（一）：朱玲玲為攝影唔敢Gel甲

 

潮流興blingbling，尤其女孩子，都愛喺隨身用品裏面加入閃閃元素，好似fancy又可愛嘅閃石iPhone電話套，就最受歡迎。早前卓妮喺個晚宴見到百仁基金副主席楊華勇（Johnny）個iPhone電話套好閃，睇真啲原來係個用黑白雙色水晶黏成嘅蝙蝠俠圖案電話套，不過覺得可愛嘅唔止係Johnny，送呢個電話套畀佢嗰位「普通」朋友仲可愛。須知道要黏一個靚嘅電話套少啲心機都唔得，佢話呢隻蝙蝠就足足用咗八個鐘先搞掂。放大圖片

Johnny再三強調，佢同呢位咁可愛嘅朋友只係「普通」關係，呢份咁花時間同心思嘅禮物亦無咩特別意思，不過佢就唔肯畀卓妮影低個套有幾靚，因為佢位「普通」朋友淨係黏咗一個畀佢，獨一無二，怕曝咗光畀人抄款喎。

「友情」得意，Johnny嘅事業亦相當順遂，全力扶助爸爸即係福建頭領楊孫西嘅香江集團。香江集團喺北京嘅財富中心已起到第三期，第二期嘅服務式住宅更高達60層樓高；正因為Johnny同爸爸經常要去北京，所以將頂樓全層留番自用。香江集團又喺家鄉福建漳州買咗400畝地作地產投資，Johnny班兄弟第日去北京或福建，都唔怕無地方落腳啦！

卓妮
討論:
分享: