2010-03-10 15:00

 

娛樂圈恩愛夫妻多的是，天王級的有黎明與樂基兒、是非多的有陳國熹與葉童、全天候晒恩愛的有楊千嬅與丁子高。不過，連踩兩場忙於宣傳新戲的「金句王」黎明，昨日卻要記者提醒，才「想起」是他與太太結婚兩周年的特別日子，認真大懵！

3月9日是黎明與樂基兒的結婚周年紀念日，但黎天王不但未有抽空陪伴愛妻，更連踩兩場為新戲《火龍》宣傳，他昨日出席第34屆香國際電影節記者會時，經記者提醒才記起昨日是結婚兩周年。當時原本沒有戴手錶的黎明竟扮作望錶，然後出奇不意彈出一句：「係喎！」記者即追問黎明是否忘記如此重要日子？黎明聽畢即急忙澄清、並扯開話題謂：「唔係唔係！今晚八點鐘仲要宣傳《火龍》！（之後慶祝？）係咯……（太太安排？）私人嘅嘢交番畀私人。」

爆林超賢暴力

未知是否不欲講多錯多，黎明擬起身離去，豈料卻被記者追問是否沒給家用樂基兒，向來醒目的黎明即還咪給記者示意訪問完結，並趁亂「鬆人」迴避有關提問，果然「大懵都有三分醒」！

在記招上，黎明在台上爆響口指導演林超賢有暴力傾向，追問他是否真的如此？黎明則貫徹似是而非作風表示：「拍動作片無一個暴力嘅感動力，係好難拍得好！導演喺呢方面係有要求，又跳樓、又跑步、又要做高難度動作，我完全覺得佢有創意，佢完全可以將暴力世界駕馭喺電影世界入面，畀觀眾識得分享同分析對與錯。」問到導演有甚麼要求他接受不到時？黎明則搞爛gag謂：「六樓跳落嚟高唔高呀？係有高度，但無難度咯，只係受唔受傷嘅問題！」

此外，問到黎明先後出信控告Neway及加州紅侵犯歌曲版權，他即將波拋給Amusic行政總裁王凱文表示：「佢叫我專心做好呢套戲嘅宣傳，其他嘅事佢會處理。」之後黎明又指事件有兩個選擇，但做法卻只有一個，令人難以理解，他說：「依家有兩個選擇，一係繼續畀人非法使用，一係依法行使公正，而佢只能作出依法行使公正嘅決定！」另外他又否認樂基兒簽約其公司是因為二人是夫妻：「唔關事，係陳善之！佢（樂基兒）唔係同我傾！我無乜需要唔接受。（你哋會唔會合作？）暫時無。（太太強攻模特兒市場？）無諗到咁遠，如果世界咁簡單就好喇！」

四少女摸上門

之後，黎明返回Amusic繼續開工，期間更發生小插曲，黎明座駕駛入公司時，碰巧有四名少女到來，但逗留五分鐘後離開！對於四名少女來「敲門」，Amusic發言人沈小姐表示她們是來公司拿東西，並非與黎生見面。而昨晚黎明完成新作《火龍》的MV首播禮活動後，便乘保母車返上水愛巢與太太慶祝。

文：影視組