絲絲講場：詹培忠薦周文耀選議員
2010-03-10 15:00
上一則新聞: 中環研語：大國小鎮緊連起飛
揚言唔選下屆立會
如果佢唔再選，邊個有資格可以做佢嘅接班人？詹培忠第一時間就諗起港交所（00388）前行政總裁周文耀，話保羅（周之洋名）係最佳人選。聽聞唔單止詹培忠，股壇仲有其他人士游說保羅出選。
除咗周文耀，詹培忠話商交所主席張震遠做期貨，亦可以參選。當然如果老詹下屆真係唔選，唔少經紀業界肯定會吼住這個位，一場混戰在所難免。老詹話選自己嘅「鐵票」估計就話有數百張啫，但當中能夠成功「過票」畀佢推薦嘅人，就相信唔會有好多票，佢喺數票呢方面絕對係心思細密！
趁復活節再戰賭城
常言話「80歲前一定要退休」嘅佢，依家距離80歲大壽仲有大把日子，佢下屆係咪真係唔再選？大家等多兩年，即係二○一二年就自有分曉！除咗做議員及買殼賣殼外，老詹最大興趣就係去賭城拉斯維加斯玩百家樂，繼剛過去嘅聖誕節及新年去賭城「斬獲」過千萬元後，佢趁住今個復活節檔期，又會再飛去賭城玩一轉呢！
余絲韻
討論:
| 分享: | |
|
|
|