中環出更：余志明去天香樓：「好似返咗屋企」
2010-03-10 15:00
上一則新聞: 法庭新聞：餐廳東主涉毆「護花」中大導師
Gabriel喜歡天香樓嘅原因係「感覺好似返到自己屋企」。幫襯咁多年，佢話啲夥計已娙熟晒佢嘅口味，唔使佢點菜，佢推介呢度嘅蟹粉豆腐、煙熏黃魚、生爆鱔背同埋龍井蝦仁，仲有佢哋自己釀造嘅三十年加飯酒。余太就至愛佢哋嘅招牌糖水酒釀丸子。煙熏黃魚以龍井茶同沙糖作為煙熏用料。
位於尖沙咀柯士甸路嘅天香樓，五十年前由韓桐椿開設，搬到現址已經三十幾年，間舖夠晒古色古香，為咗確保品質，到依家都係維持只有九張枱。韓老闆今年已經八十八歲，間舖已交咗畀孻女韓美娜去打理。
招牌蟹粉加飯酒
娜姐話畀卓妮聽，Gabriel鍾意嘅菜式都係佢哋招牌菜。佢哋嘅拿手菜式清炒蟹粉、蟹皇翅，特點係採用陽澄湖嘅大閘蟹，為咗確保蟹隻新鮮肥美，佢哋每星期都會派專人北上兩次親自揀選，故一年四季都有供應。
煮乜嘢餸都好，調味料每每係食物嘅靈魂。天香樓特製嘅醋可謂係鎮店之寶，娜姐同卓妮透露，啲醋係用上海醋、浙江醋同埋鎮江醋混合而成，絕對獨一無二。Gabriel盛讚嘅加飯酒來頭都唔小，係天香樓自己釀足三十年嘅陳年老酒，娜姐話同蟹粉一齊食就最正嘞。
睇天香樓四處可見嘅字畫，就知有唔少名人雅士留低足迹。好似「天香樓」牌匾，就係由國畫大師張大千親自題字。
卓妮
討論:
| 分享: | |
|
|
|