絲絲講場：渣打加薪派花紅算手鬆
2010-03-06 15:00
上一則新聞: 三寶精點
絲絲同友人傾開，先知原來渣打尋日開始陸續派信畀員工，通知今年獲派幾多花紅及加幾多人工。
個人銀行花紅幾和味
佢哋個人銀行業務員工今年分嘅花紅，好似話最多有3、4個月人工，當然表現好啲嘅員工花紅會仲多啲，而加薪嘅幅度就最多4至5個巴仙，有啲同事計埋升職加幅更達雙位數添。
去年盈利下跌嘅渣打個人銀行對待員工都咁好，絲絲相信佢哋係盈利表現繼續突出嘅企業銀行，無論係花紅或人工方面會更優待啲員工。去年風雨飄搖之時，渣打冇加薪畀員工，但隨着下半年市況慢慢好番，銀行界又開始搶人，所以佢哋早喺去年第四季已加咗一次人工畀部分員工。
除咗大銀行有人工加，絲絲又八到中小型銀行一樣加薪，好似話星展嘅加幅係最多3%，而永亨就最多2.5%，睇嚟加幅唔夠大行咁吸引喎。
余絲韻
討論:
| 分享: | |
|
|
|