中環出更一：張綠萍教女演講傳授秘笈

2009-03-14 15:00

跟蹤提及過的人和物:

上一則新聞: 政情：議員亂入Ｑ公僕谷到爆

 



哥哥張國榮個外甥女、經機會委員麥嘉軒早前初試啼聲，同幾位經機會成員見記者，甚有大將風範，被視為政壇明日之星。嘉軒咁有觀眾緣，原來多得曾任消委會首任總幹事媽媽張綠萍路。

張綠萍尋日拖埋老公前運輸司麥法誠出席高華文授理大舉行雕塑展。張綠萍同高華文識於微時，彼此同為聖保羅男女校同學，小學、中學到入埋港大都係同窗，有緣到極。老友搞展覽，梗要畀面撐場！

卓妮問起大孖麥嘉軒點解講咁淡定？張綠萍喜上眉梢，話私底下傳授唔少演講技巧畀乖女，事關當年佢做消委會一姐時見慣大場面，同記者交慣手；阿女出到聲，張綠萍即時過招，佢話講技巧最重要係做足功課，對所講題材要滾瓜爛熟，咁就唔怕畀人問到口啞啞。若然真係遇到棘手問題，千祈咪充「大頭鬼」，要坦白話畀人知自己唔識喎！

理大秋官日日踩單車

佢話麥嘉軒初次面對公眾講時，都事先「預演」一次畀阿媽睇。計卓妮話齋，嘉軒似足舅父張國榮咁有觀眾緣，投身政界，不難成為靚女政治明星。

張綠萍女有方，但講到投資就麻麻。佢扁嘴話，金融海嘯中損手唔少，雖然冇買豐，但買落股票蒸發七、八成，令佢非常心痛，幸好投資只佔身家一部分，唔影響生活質素，靚衫一樣照買，惟有安慰自己話「願賭就要服輸」，希望有日盡快返家鄉。

同場仲有人稱「理大秋官」理大校長唐偉章，佢自爆有個減壓良方，就係每日踩健身單車半粒鐘。原來唐校長自細熱愛踩單車，多年未變，即使由美國移居香港，第一件事就係添置一部健身單車，每日邊踩車邊睇電視，所以身形多年來Fit到漏。

卓妮

討論:
分享: